Экономика министрлигинде коррупциянын алдын алуу чаралары талкууланды
Экономика жана коммерция министрлигинин Пресс-борборунда мамлекеттик сектордогу коррупциялык көрүнүштөрдүн алдын алуунун натыйжалуу механизмдерин талкуулаган “Коррупцияга каршы саясат” семинары болуп өттү.
Экономика министрлигинин маалыматына ылайык, семинарды министрликтин коррупциянын алдын алуу маселелери боюнча ыйгарым укуктуу өкүлү Назгүл Сыдыгалиева өткөрдү. Иш-чаранын максаты — мамлекеттик органдардын коррупцияга каршы чараларды иштеп чыгуу жана ишке ашырууда адистердин кесиптик компетенциясын жогорулатуу.
Катышуучулар улуттук коррупцияга каршы мыйзамдарды өркүндөтүү, коррупциялык тобокелдиктерди аныктоо жана баалоо, ички контролдоо системасынын негизги элементтери, кызматтык этиканын бузулушун алдын алуу жана кызыкчылыктардын кагылышын жөнгө салуу механизмдери боюнча практикалык көндүмдөрдү алды.
Семинарда ошондой эле өлкөнүн коррупцияны кабылдоо индекси, калктын министрликке болгон ишеним динамикасы жана коңшу өлкөлөрдүн коррупцияга каршы механизмдери салыштырылды.
