КУЭТ 370 млн сомго күйүүчү-майлоочу материалдарды сатып алууга тендер жарыялады
"Кыргызстандын Улуттук электр тармагы" ААК (КУЭТ) өз ишмердүүлүгүн камсыз кылуу үчүн күйүүчү-майлоочу материалдарды сатып алууга тендер жарыялаганы мамлекеттик сатып алуулар порталында маалымдалды.
Маалыматка ылайык, сатып алуу стандарттык форматта жүргүзүлүп, күйүүчү майды өлкө аймагындагы автоунаа май куюучу жайлардын (АЗС) тармагы аркылуу жеткирүү каралган. Пландалган чыгымдардын жалпы суммасы 370,2 миллион сомду түзөт.
Мекеме төрт лот түзгөн. Алардын ичинен эң ири көлөм бензин Аи-92ге туура келип, анын суммасы 193,4 миллион сомду түзөт. Андан кийин дизель отуну — 145,8 миллион сом, бензин Аи-95 — 30,8 миллион сом жана суюлтулган көмүр суутек газы (пропан) — 164,5 миң сом болгон. Күйүүчү май республиканын бардык аймактарында жайгашкан АЗСтар аркылуу күн сайын жеткирилиши керек.
Квалификациялык талаптардын пакетинде салык жана милдеттүү төлөмдөр боюнча карыздын жоктугу, бардык облустарда К5 класстан төмөн эмес күйүүчү майы бар АЗСтардын жана күйүүчү май карталары боюнча иштеген эсепке алуу системасынын болушу, ошондой эле буйрутмачынын талабы боюнча АЗСтардагы видеокөзөмөл архивдерин берүүгө даярдык көрсөтүү талаптары камтылган.
