Ош шаарынын жолдорун оңдоого 15,39 млн доллар кредит жана грант тартылат
"Ош шаарынын жолдорун жакшыртуу" долбоорунун жалпы наркы 19,3 млн долларды түзөт. Анын ичинен 15,39 млн доллар Евразия өнүктүрүү банкы тарабынан кредит жана грант түрүндө каржыланат, ал эми 3,9 млн доллар республикалык бюджеттен кошкаржылоо катары бөлүнөт.
Бул тууралуу бүгүн Жогорку Кеңештин эл аралык иштер боюнча комитетинин жыйынында транспорт министринин орун басары Бекназар Базаралиев билдирди.
Анын айтымында, долбоор Бабараимова жана Шамшат көчөлөрүн реконструкциялоону камтыйт. Бул көчөлөрдүн жалпы узундугу 3,2 км болуп, алар төрт тилкеге чейин кеңейтилет, ошондой эле эки ири жол өтмөгү (путепровод) курулат.
"Бул көпүрөлөрдүн биринчиси Масалиев жана Ленин көчөлөрүнүн кесилишине туташат. Экинчиси болсо Акбугур тоолорунун ары жагында жайгашкан эски базарга, Бишкек–Ош унаа жолунан Ош шаарынын борборунун батыш бөлүгүнө тоскоолдуксуз жетүүнү камсыз кылат", — деди ал.
Министрдин орун басары белгилегендей, долбоор ишке ашырылгандан кийин Ош шаарындагы негизги автомагистралдарга болгон жүк 50%га чейин азаят, жолдо жүрүүгө кеткен убакыт кыйла кыскарат жана шаар тургундары менен коноктору үчүн ыңгайлуулук жогорулайт.
"Долбоордун техникалык-экономикалык негиздемеси 2025-жылы “Ош шаардык жолдору” муниципалдык ишканасы тарабынан учурдагы стандарттарга жана эл аралык тажрыйбага ылайык иштелип чыккан. Долбоорду ишке ашыруу жана аткаруу мөөнөтү 2026–2028-жылдарга пландалган. Долбоордун жалпы наркы 19,3 млн долларды түзөт.
Анын ичинен 15,39 млн доллар Евразия өнүктүрүү банкы тарабынан кредит жана грант түрүндө берилет, ал эми 3,9 млн доллар республикалык бюджеттен каржыланат. Кредит 15 жылдык мөөнөткө берилет, жеңилдетилген мөөнөт — 5 жыл, пайыздык чен 1,2%ды түзөт", — деп кошумчалады ал.
Анын айтымында, бүгүнкү күндө долбоор мамлекеттик ички бардык процедуралардан толук өткөн.
