ЕАЭБде каботаждык жүк ташуулар программасы 2026-жылы иштей баштайт
ЕАЭБ өлкөлөрү үчүн каботаждык (жээк бойлой) жүк ташуулар программасы 2026-жылы толук кандуу иштей баштарын Евразия экономикалык комиссиясынын энергетика жана инфраструктура боюнча министри Арзыбек Кожошев2025-жыл жыйынтыкталып жатып билдирди.
Буга улай ал транспорт тармагындагы жетишкендиктерге токтолду. Анын айтымында, транспорт тармагында санариптештирүү иштери уланып жатат. Жүктөрдү коопсуз бекитүү үчүн программалык камсыздоону иштеп чыгуу башталды. Электрондук эл аралык жүк ташуу коштомо кагаздарын (e-CMR) колдонуу боюнча пилоттук долбоор ишке киргизилди. Навигациялык пломбаларды колдонууга киргизүү үчүн зарыл болгон иш-чаралар аткарылды.
Транспорт каражаттарынын уруксат берилген салмактары, октук жүктөмдөрү жана габариттери тууралуу макулдашууга кол коюлуп, ратификацияга жөнөтүлдү.
Интеллектуалдык транспорттук системаларды өнүктүрүү боюнча жол картасы кабыл алынып, анын алкагында негизги сервистердин тизмеси аныкталган концепция макулдашылды.
"Бештик" өлкөлөрүнүн үчүнчү мамлекеттер менен биргеликте ишке ашыра турган инфраструктуралык долбоорлордун пулун түзүү боюнча чечим даярдалды.
Энергетика тармагындагы негизги жетишкендиктердин бири катары ЕАЭБде электр энергиясы менен соода жүргүзүүгө кошулуу тууралуу келишимдин формасы иштелип чыкты. Ал кабыл алынгандан кийин электр энергиясы рыногунун технологиялык жана маалыматтык платформасын даярдоо иштери башталат.
Мындан тышкары, мунай, газ жана мунай продуктулары боюнча үч жылдык индикативдик баланстар иштелип чыкты.
Ошондой эле жалпы газ рыногун өнүктүрүү планы даярдалды. Мунай тармагында болсо соода жүргүзүүнүн жана биржалык сооданын эрежелеринин долбоорлору иштелип чыкты.
