"Автомаш Радиатор" компаниясы Кыргызстанга 8800 техника алып келген
Бүгүн Суу ресурстары, айыл чарба жана кайра иштетүү өнөр жайы министрлиги дыйкан-фермерлерге жана айыл чарба товар өндүрүүчүлөрүнө айыл чарба техникасын алуу мүмкүнчүлүктөрүн тааныштыруу максатында “Автомаш Радиотар” компаниясына пресс-тур уюштурду.
“Автомаш Радиатор” ЖЧКсы КМШ өлкөлөрүндө жана Борбор Азияда толук цикл менен радиаторлорду жана жылуулук алмаштыргычтарды иштеп чыгуучу жана өндүрүүчү алдыңкы ишканалардын бири. Ишкана автоунаалар, тракторлор, комбайндар, энергетикалык жана атайын техникалар үчүн муздатуу системаларын чыгарат.
Заводдо экологиялык таза Nocolok технологиясы менен алюминий радиаторлор, ошондой эле салттуу ыкмада жез-латун радиаторлор өндүрүлөт. Продукция ISO 9001:2015 жана IATF 16949:2016 эл аралык сапат стандарттарына жооп берет.
Аталган компаниянын Сатуу жана маркетинг боюнча директору Александр Поповдун айтымында, 2009-жылы Кыргызсанга айыл чарба техникаларын жеткирүү багытында да иш алып бара баштаган. “Биздин компанияда ЕАЭБ аймагында чыгарылган продукциялардын бардык түрү сунушталат. Биз “МТЗ”, “Россельмаш”, “Гомсельмаш” “Минск автоунаа заводу” сыяктуу компаниялардын өнөктөшүбүз. Бул жердеги фермерлерге сунушталган техникалардын баарына биздин ишканада чыгарылган радиаторлор коюлат. Ошол себептен эки тараптуу кызматташуу жакшы жолго коюлган. 2009-жылдан бери Кыргызстан аймагында биз 8 миң дөңгөлөктүү трактор, 350дөй дан жыйноочу комбайн жана 460тай коммуналдык жана атайын техникалар сатылды. Бишкек мэриясы менен да кызматташып, ар жылы жолдорду тазалоочу техникаларды алып келип берип турабыз”,-дейт А.Попов.
Аталган компаниядан “Элдик банк” аркылуу жеңилдетилген шартта 6% менен лизингге трактор алып жаткан Талас облусунун Кара Буура районунун тургуну Эрнис Байысбек уулу буларга токтолду. “Мен азыр МТЗ-80 үлгүсүндөгү тракторду 7 жылдык мөөнөт менен лизингге алдым. Мурда баштапкы төлөм 30% болсо, азыр аны мамлекет 10%га түшүрүп фермер, дыйкандарга абдан жакшы жеңилдик болду. Трактордун өзүнүн негизги баасы 2 млн 450 миң сом болду. 6 пайыздык үстөгүн кошкондо 3 миллионго жетпеген сом төгөт экем”,-дейт ал.
“Автомаш Радиотар” компаниясынын директору Юрий Владимировдун айтымында, бул заводдон чыккан радиаторлордун 90%дан ашыгы ЕАЭБ өлкөлөрүнө экспорттолот. “Биздин радиаторлорду колдонуучулардын ичинде Минск автоунаа заводу, Минск трактор заводдору, “Россельмаш”, “Гомсельмаш” сыяктуу ири компаниялар бар. Ишканабызда азыр 500дөн ашык адам эмгектенет. Жумушчулардын эмнек акылары өз убагында төлөнөт. Орточо маяна бизде 60 миң сомдун тегереги. Жыл сайын ишканабыз өндүрүш көлөмүн 10-15%га жогорулатып келе жатат. Рынокко жаңы продукцияларды сунуштап жатабыз”,-дейт ал. Буга улай ал дүйнөлүк рынокто алюминий, жез кымбаттаганына байланыштуу жарым жылда бир товар баалары өзгөрүп жатканын кошумчалады. Ошондой эле ал бул жерде чыгарылган радиаторлордун 2%ы гана Кыргызстан ичинде каларын билдирди.
