"Энесай" менен "Дордой" жаңы конуштарынын ортосунда 20 гектар аянттагы парк ачылат
Бишкек мэриясы "Энесай" жана "Дордой" турак жай массивдеринин ортосунда парк уюштурууну пландап жатканын бүгүн Жогорку Кеңештин Агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин жыйынында вице-мэр Рамиз Алиев билдирди.
Ал буларды депутат Табылды Муратбековдун эки турак жай массивинин ортосундагы парк куруу боюнча мэриянын планы ишке ашырылабы деген суроосуна жооп берип жатып айтты. Вице-мэрдин айтымында, парк же сквер 20 гектар аянтка уюштурулат.
"Эскиздик план даяр, каржылоо каралган. Бирок айрым маселелер бар. Жерлердин бир бөлүгү жеке менчикте. Биз бул жерлерди мамлекеттик менчикке кайтаруу үчүн сот аркылуу аракет кылып жатабыз. Мындан тышкары, бул жерден Аламүдүн дарыясы агып өтөт. Ал жерде коопсуздук маселелерин чечүү керек. Бул маселелер чечилгенден кийин гана парк ачууга даярдык башталат", — деди Алиев.
Табылды Муратбеков бул маселени тезирээк чечүүнү сунуштап, жашоочулар үчүн ал өтө маанилүү экенин белгиледи.
