Чүй облусунда балык уулоо сезону расмий ачылды
Чүй облусунда Министрлер кабинетинин төрагасы Адылбек Касымалиев "Балык уулоо сезону 2026" эл аралык спорттук турниринде катышып, расмий түрдө балык уулоо сезонун ачты.
Анын айтымында, Кыргызстанда балык чарбасы жана спорттук балык уулоо тармагында чоң мүмкүнчүлүктөр бар. Өлкөнүн ички муктаждыгы толугу менен камсыздалып, балык продукциясын экспорттоо да өнүгүп жатат. Балыкчылар үчүн Agro-Smart платформасы аркылуу электрондук билет системасы иштейт.
Анда Адылбек Касымалиев Кыргызстан – тоолуу өлкө, ошол эле учурда Борбор Азиянын суу мунарасы экенин белгилеп, спорттук жана ышкыбоздук балык уулоо үчүн суу объекттери ылайыкташканын билдирди.
Касымалиев спортчулардын жетишкендиктерин да белгиледи: Кыргызстан курама командасы "фидер" дисциплинасы боюнча 2024-жылы Испанияда өткөн дүйнө чемпионатында 20-орунду ээлеген. Ал эми апрель айында команда Италияда өтө турган кезектеги дүйнө чемпионатына катышат.
МинКаб төрагасы балык уулоо адамда сабырдуулукту, чыдамкайлыкты жана ички күчтү калыптандырып, табият менен гармонияда болууга жардам берерин баса белгиледи.
Эске салсак, эл аралык турнир 28–29-март күндөрү Чүй облусунун Аламүдүн районунда өтүп, ага Кыргызстан, Казакстан жана Өзбекстандан 60 спортчу катышкан. Жеңүүчүлөр жана байге ээлери атайын сыйлыктар менен сыйланышты.
Мындан тышкары, Министрлер кабинетинин төрагасы Кыргызстан балык спорту федерациясын 10 жылдык мааракеси менен куттуктады.
