Кыргызстанда мамлекеттик органдар менен интеграцияланган инвестициялар платформасы түзүлөт
Кыргызстанда инвестициялар үчүн бирдиктүү автоматташтырылган маалыматтык система (АМС) түзүү каралып жатканын Инвестициялар боюнча улуттук агенттиктин инвестицияларды тартуу жана аймактык өнүгүү башкармалыгынын башчысы Сухраб Разаков радионун эфиринде билдирди.
Анын айтымында, платформаны ишке киргизүү 2026-жылга пландалган. Ал ишкерлерге жана инвесторлорго долбоорлорду ишке ашыруу үчүн аймактар (облустар, шаарлар жана айылдар) боюнча маалымат алууга мүмкүнчүлүк берет.
Разаков белгилегендей, COVID-19 пандемиясынан кийин экономика жигердүү калыбына келе баштады жана инвестициялык активдүүлүк жыл сайын өсүүдө. Бул бардык тармактарда, анын ичинде курулуш секторунда да байкалууда.
"Бүгүнкү күндө өлкөдө жарандар үчүн гана эмес, Кыргызстанда иш жүргүзүүнү каалаган инвесторлор жана бизнес өкүлдөрү үчүн да жагымдуу шарттар түзүлүүдө", — деди ал.
Анын кошумчалаганына караганда, жаңы платформа чет элдик жана ички инвесторлорго керектүү маалыматтарды алууга жардам берип, мамлекеттик органдар менен өз ара аракеттенүүнү жеңилдетет.
"Бул бардык колдонуучулар үчүн ачык жана жөнөкөй платформа болот", — деп жыйынтыктады Разаков.
