ELQR системасын түзүүгө салымын кошкон айрым адистер сыйланды
Улуттук банкта банк кызматкеринин күнүнө карата ELQR системасын түзүүгө салымын кошкон айрым кызматкерлерди, банк жана төлөм секторлорунун өкүлдөрүн, ошондой эле ведомстволор аралык жана жумушчу топтордун катышуучуларын сыйлоо аземи болуп өттү.
Улуттук банктын басма сөз кызматынын маалыматына ылайык, QR-коддордун бирдиктүү стандартын киргизүү өлкөнүн каржы секторун санариптештирүүнүн негизги этабы болуп саналат. Аны ишке ашыруу үчүн Улуттук банк, мамлекеттик органдарды жана банк коомчулугу менен биргелешип узак жана татаал ишти аркалап, Кыргызстанда төлөмдөрдүн заманбап инфраструктурасын түзүүгө жетишкен.
Ушуга ылайык, республиканын санариптик технологияларын өнүктүрүүгө салымы кошкон айрым кызматкерлер катышып, аларга тийиштүү сыйлыктар тапшырылды.
Бирок, аталган ишчарага ELQR системасын иштеп чыгууга, масштабдоого, сандык жана сапаттык көрсөткүчтөрүн өнүктүрүүгө зор салымын кошкон, Улуттук банктын санарип жана финансы технологияларын өнүктүрүү бөлүмүнүн мурдагы башчысы Айгүл Бакесариева катышкан жок. Эске салсак, Бакесариева ELQR системасы жана санарип сом заманбап төлөм каражатын иштеп чыгуу боюнча салымын кошкон адис катары коомчулукка кеңири таанымал.
