Күйүүчү-майлоочу майларга субсидия берүү тартибин өзгөртүү сунушталууда
КРнын Министрлер Кабинети күйүүчү-майлоочу материалдардын рыноктогу бааларын турукташтырууга багытталган токтомго өзгөртүүлөрдү киргизүү долбоорун коомдук талкууга алып чыкты. Документ 2026-жылдын 8-августуна чейин коомдук талкууда болот.
Сунушталган өзгөртүүлөргө ылайык, Түрксиб жана Сары-Агач темир жол станцияларынын жеткирүү базисинде, ошондой эле үчүнчү өлкөлөрдөн импорттоодо КРнын мамлекеттик чек арасында импорттолгон күйүүчү-майлоочу материалдарды сатып алуунун белгиленген баалары төмөнкү деңгээлде аныкталат:
- АИ-92 бензини – тоннасына 1100 $;
- дизель отуну – тоннасына 1200 $;
- автомобиль үчүн суюлтулган газ – тоннасына 700 $ өлчөмүндө белгиленет.
Мындан сырткары, субсидия берүү тартибине бир катар өзгөртүүлөр сунушталууда. Алардын негизгилери, АИ-95 бензини субсидия берилүүчү күйүүчү майлардын тизмесинен чыгарылат; субсидияны бааларды жөнгө салуу боюнча өкмөт менен макулдашуу түзгөн импорттоочу жана сатуучу компаниялар гана ала алат; субсидиянын өлчөмү импорттун келишимдик баасы менен өкмөт белгилеген баанын айырмасынын негизинде, ташуу жана башка чыгымдарды эске алуу менен эсептелет.
Ошондой эле субсидия алуу үчүн документтердин тизмеси кеңейтилет. Импорттун көлөмү, келишимдер, эсеп-фактуралар, ташуу чыгымдары, КНС төлөнгөнүн тастыктаган документтер жана күйүүчү майды маркалоого байланыштуу маалыматтарды тапшыруу талап кылынат.
Долбоордо арыздарды кароо тартиби да өзгөртүлүп, аларды Мамлекеттик салык кызматы, Мамлекеттик бажы кызматы жана Монополияга каршы жөнгө салуу кызматы карап чыгып, андан соң ведомстволор аралык жумушчу топко жөнөтөрү сунушталган.
Документтин негиздемесинде өзгөртүүлөр экономикалык коопсуздукту камсыздоо, өлкөнү күйүүчү-майлоочу материалдар менен үзгүлтүксүз камсыз кылуу жана бул тармактагы ишкерлерди мамлекеттик колдоо максатында иштелип чыкканы белгиленген.
