Салык кызматы 1,4 млн сомдук мыйзамсыз товарларды аныктады
Мамлекеттик салык кызматы рейддик иш-чаралардын жүрүшүндө өлкөнүн аймагына товарларды мыйзамсыз алып кирүү фактысын аныктады.
Мекеменин маалыматына ылайык, рейддик иш-чаралардын жүрүшүндө Евразия экономикалык бирлигине (ЕАЭБ) мүчө мамлекеттердин биринен үй буюмдарын ташып келе жаткан жүк ташуучу унаа текшерүүгө алынган.
Текшерүүнүн жыйынтыгында тиешелүү коштомо документтери жок ташылып келген эл керектөөчү товарлар аныкталган. Алдын ала эсептөөлөр боюнча, эсепке алынбаган товарлардын жалпы баасы 1 млн 400 миң сомдон ашат.
Учурда бул факты боюнча мамлекеттик бюджетке төлөнүүгө тийиш болгон салыктарды өндүрүү боюнча тиешелүү иштер жүргүзүлүп жатат.
Салык кызматынан белгилешкендей, мындай көзөмөл иш-чаралары товарларды мыйзамсыз алып кирүүгө бөгөт коюу, бюджетке салыктык түшүүлөрдү толук камсыз кылуу жана тышкы экономикалык ишмердүүлүктүн ак ниет катышуучулары үчүн бирдей атаандаштык шарттарын түзүү максатында улантылат.
