Электрондук эсеп-фактураларды тариздөө тартибин өзгөртүү сунушталууда

Мамлекеттик салык кызматы электрондук эсеп-фактураларды (ЭЭФ) тариздөө жана колдонуу тартибине өзгөртүүлөрдү киргизүү сунушун коомдук талкууга койду. Долбоор салык мыйзамдарындагы акыркы өзгөртүүлөргө ылайыкташтыруу жана салыктык башкарууну санариптештирүүнү өркүндөтүү максатында даярдалган.

Долбоорго ылайык, ЭЭФти толтурууда көрсөтүлүүчү милдеттүү маалыматтар такталууда. Анын ичинде:

• товарды, жумушту же кызматты сатуучунун жана сатып алуучунун идентификациялык номери, аталышы;
• товар же кызматтын коду, аталышы, көлөмү, баасы, салыктардын ставкалары жана суммалары;
• төлөө формасы, накталай эмес төлөмдөрдө банктык реквизиттерди көрсөтүү талаптары такталат;
• кошумча нарк салыгынын ставкасы жана суммасы;
• банктык идентификациялык код (БИК), банктын аталышы жана жеткирүүчүнүн /сатып алуучунун банктык эсебинин номери – накталай эмес төлөм формасында төмөнкү учурларды кошпогондо талап кылынбайт: калкка сатууда, соода платформалары аркылуу товар жеткирүүдө жана жеке маалыматтары көрсөтүлбөгөн субъекттерге товар сатууда.
• авто май куюучу станцияларда отун картасы, талон же тастыктама аркылуу мунай продуктуларын сатууда ЭЭФти тариздөө боюнча өзүнчө норма киргизүү сунушталууда.

Долбоордо буга чейин ЭЭФке жаңылыш киргизилип кеткен товарлардын санын же көлөмүн түзөтүү тартиби да такталат. Мындан тышкары, ЭЭФ төлөмдүн формасы — накталай, накталай эмес, кайтарымсыз же товар алмашуу түрүндө көрсөтүлөт.

Маалыматка ылайык, өзгөртүүлөрдүн негизги максаты — ЭЭФти толтуруудагы түшүнбөстүктөрдү азайтуу жана электрондук салыктык башкарууну жакшыртуу болуп саналат.

Ошондой эле бул долбоорду кабыл алуу - тартиптин жоболорун салык төлөөчүлөр жана салык органдары тарабынан бирдей колдонууга, ЭЭФти түзөтүүдө келип чыгуучу эки ача түшүнүктөрдү жоюуга, ошондой эле ЭЭФти тариздөөдө кетирилген каталардын санын азайтууга мүмкүндүк берет.

Мамлекеттик салык кызматынын коомдук талкуудагы ушул долбооруна карата   сунуш-пикирлер 27-августка чейин кабыл алынат.