“Учкун” 23 млн сомдук окуу китептерин кимдерге сатканын түшүндүрдү
“Учкун” ААКы 23 млн сомдук мектеп окуу китептерин саткан. Басмакана китептерди акыркы керектөөчүлөргө кайрылуулар боюнча сатканын жана бул мыйзам бузуу эмес экенин билдирди. Мында маалыматты “Учкун” ААКнын өндүрүш боюнча директору Кубат Бейшеев маалымат жыйынында кабарлады.
Анын айтымында, басмакана акыркы эки жылдан бери Билим берүү министрлиги жана “Окуу китеби” басма үйү менен келишимдин негизинде мектептер үчүн окуу китептерин басып чыгарат. Министрлик китептердин санын жана тиражын аныктайт, “Учкун” аларды басып чыгарып, аймактарга жеткирет.
Бейшеевдин маалыматына караганда, укук ээси менен түзүлгөн лицензиялык келишим басмаканага окуу китептерин акыркы керектөөчүлөргө сатууга уруксат берген. Анын ичинде жеке мектептерге жана китеби жоголгон же бузулган ата-энелерге сатылган. Бул түшүндүрмө «Дордой» базарында окуу китептери сатылып жатканы тууралуу маалыматтан кийин жүргүзүлүп жаткан текшерүүнүн фонунда айтылды.
Эске салсак, 15-сентябрда ЖКтин депутаты Дастан Бекешев “Дордой” базарынан “Учкунда” басылган - “Сатууга болбойт” деген белгиси бар 3-класстын математика китебин 650 сомго сатып алганын билдирген. Буга байланыштуу Министрлер кабинетинин төрагасы Адылбек Касымалиев - ИИМге, УКМКга жана Агартуу министрлигине китептердин эркин сатууга кандайча түшүп калганын аныктоону тапшырган.
