Туруктуу өнүгүү максаттарын ишке ашыруу боюнча жумушчу топтун кеңешмеси өттү
Бүгүн Жогорку Кеңештин Финансы, бюджет, ишкердик жана атаандаштыкты өнүктүрүү боюнча комитетинин Туруктуу өнүгүү максаттарын ишке ашыруу боюнча жумушчу тобунун кеңешмеси өткөрүлүп, ага Жогорку Кеңештин депутаттары, мамлекеттик органдардын, эл аралык уюмдардын жана эксперттик коомчулуктун өкүлдөрү катышты.
Билдирүүгө караганда, кеңешменин негизги максаты – Туруктуу өнүгүү максаттары боюнча жумушчу топтун ишин уюштурууга байланышкан негизги документтерди карап чыгуу, жумушчу топтун курамына байланыштуу маселени талкуулоо, ошондой эле тиешелүү министрликтердин маалыматтарын угуу болуп саналат.
Ушуга байланыштуу кеңешменин алкагында тиешелүү министрликтердин маалыматтары угулуп, алар социалдык жана экономикалык тармактардагы негизги көрсөткүчтөргө токтолушту. Тагыраагы, экономикалык өсүштү камсыз кылуу, жумушсуздуктун деңгээлин төмөндөтүү, медициналык жана билим берүү кызматтарынын жеткиликтүүлүгүн жана сапатын жогорулатуу боюнча иштер тууралуу маалымат беришти.
Мындан сырткары Бириккен Улуттар Уюмунун КРгы Туруктуу координаторунун кеңсесинин өкүлү Каныкей Орозбаева Кыргызстан Туруктуу өнүгүү максаттарын ишке ашыруу боюнча бир катар жакшы көрсөткүчтөргө ээ экенин белгиледи.
Анын айтымында, туруктуу өнүгүү индексинде Кыргызстан 169 өлкөнүн ичинен 50-орунду ээледи. Ошондой эле өлкөдө Туруктуу өнүгүү максаттарына багытталган көптөгөн глобалдык демилгелер жана долбоорлор ишке ашырылып жатканын белгилеп, алардын натыйжалуулугун жогорулатуу үчүн бардык тараптардын аракеттерин бириктирүү керектигин кошумчалады.
