Чүйдөгү абакта электр прожекторлорун өндүрүүчү жаңы цех ишке кирди

Жазаларды аткаруу мамлекеттик кызматынын № 1 мекемесинде "Макс Свето Техника" бренди астында көчөдө колдонулуучу электр жабдууларын өндүрүүчү жаңы цех ишке кирди.

Мекемеден кабарлагандай, учурда 25 соттолгон адам пилоттук режимде окуудан өтүп, өндүрүш процессин өздөштүрүүдө.

Цех толук өндүрүштүк кубаттуулукка чыккан соң 50гө чейин соттолгон адамды жумуш менен камсыз кылуу пландалууда.

Мындан тышкары, мекеменин аймагында жумшак жана корпустук эмеректерди, чыпкаларды, кепкаларды, пластикалык терезе жана эшиктерди өндүрүүчү цехтер, ошондой эле автоунааларды тейлөө борбору (СТО) иштеп жатат.