Кыргызстанда инвестициялык долбоорлорду ишке ашыруу маселеси талкууланды
Бүгүн инвестициялар боюнча улуттук агенттиктин башчысынын орун басары Мээримбек Койчуманов Кыргызстандын Кувейттеги элчиси Нурлан Качкынбаевич Токобаев, ошондой эле Иордания жана Бириккен Араб Эмираттарынан келген чет элдик инвесторлор менен сүйлөшүүлөрдү жүргүздү.
Иш-чарага профессор Рияд Таха Аль-Касасбех (Иордания), профессор Юсеф Махмуд Мохаммад Аль-Ассаф (БАЭ) жана жеке ишкер Курманбек Жолдошбеков катышты.
Билдирүүгө караганда, тараптар Кыргызстанда инвестициялык долбоорлорду ишке ашыруунун келечегин, өз ара кызматташуунун мүмкүн болгон багыттарын жана өлкөдө инвестициялык ишмердүүлүктү жүргүзүү үчүн түзүлгөн шарттарды талкуулашты.
Койчуманов катышуучуларга Кыргыз Республикасынын инвестициялык потенциалы, колдонуудагы инвестициялык мыйзамдар, мамлекеттик колдоо чаралары жана чет элдик инвесторлорду коштоо механизмдери тууралуу маалымат берди.
Профессор Рияд Таха Аль-Касасбехтин 2026-жылдын август айында Кыргыз Республикасына келип, мамлекеттик органдардын өкүлдөрү менен бир катар сүйлөшүүлөрдү жүргүзгөнү белгиленди.
Инвестициялык демилгелерди иш жүзүндө иштеп чыгуу максатында инвесторлор тарабынан Кыргыз Республикасында жоопкерчилиги чектелген коом (ЖЧК) катталган.
Улуттук агенттик инвестициялык сунуштарды кароодо, тиешелүү мамлекеттик органдар менен өз ара аракеттенүүнү уюштурууда жана долбоорлорду коштоо процессинде инвесторлорго көмөк көрсөтүүгө даяр экендигин билдирди.