Кыргызстанда 2026-жылы 17, 2027-жылы 19 чакан ГЭС курулат
2026-жылы 17 чакан ГЭС, ал эми 2027-жылы дагы 19 жаңы ГЭС куруу пландалып жатканын парламенттин жыйынында Министрлер Кабинетинин төрагасы Адылбек Касымалиев билдирди.
Анын айтымында, 2024-жылы электр энергиясын жалпы өндүрүү көлөмү 117,8 мегаваттка жеткен.
"Өткөн жылы жалпы кубаттуулугу 48,8 мегаваттты түзгөн сегиз чакан ГЭС ишке берилген, а 2025-жылы болсо кубаттуулугу 49 мегаватт болгон тогуз чакан ГЭС пайдаланууга берилди. Токтогул ГЭСи (1 миң 440 мегаватт) модернизацияланды, Таш-Коргон ГЭСинин гидроагрегаттары жаңыланууда. Ошондой эле өлкөнүн энергетикалык көз карандысыздыгын камсыз кылган жаңы чакан ГЭСтер, анын ичинде "Камбар-Ата-1" ГЭСи курулуп жатат", — деди Министрлер Кабинетинин төрагасы.
Ал ошондой эле энергетика тармагындагы компаниялар техниканы өз каражаттарынын эсебинен сатып алышканын белгилеп, өткөн жылы 129 техника, ал эми 2025-жылы 141 техника алынганын кошумчалады.
Адылбек Касымалиевдин белгилешинче, Камбар-Ата-1 ГЭСинин курулушу Кыргызстанды энергетикалык көз карандысыздыкка алып келип, келечек муундар үчүн бекем энергетикалык пайдубал түзөт.
