Ишкердикти колдоо максатында 6 млрд 781,7 млн сом насыя берилди
2026-жылдын биринчи жарым жылдыгынын жыйынтыгы боюнча Суу ресурстары, айыл чарба жана кайра иштетүү өнөр жайы министрлиги менен “АБанк” ААКнын биргелешкен ишинин алкагында өлкөнүн агроөнөр жай комплексин, айыл чарбасын жана ишкердикти колдоого багытталган мамлекеттик жеңилдетилген каржылоо программаларын ишке ашыруунун алкагында олуттуу жыйынтыктар камсыздалды.
Суу ресурстары, айыл чарба жана кайра иштетүү өнөр жайы министрлигинин маалыматына ылайык, акыркы алты айдын жыйынтыгы боюнча мамлекеттик программалардын алкагында жалпы 4 457 насыя берилип, алардын жалпы суммасы 6 млрд 781,7 млн сомду түздү. Ал эми программалар боюнча каралган жалпы каржылоо көлөмү 9 млрд 790 млн сомду түзөт.
2026-жылдын алты айында төмөнкү мамлекеттик программалар боюнча каржылоо жүргүзүлдү:
“Айыл чарбасын каржылоо – 14” программасынын алкагында 3 846 насыя берилип, жалпы 2 млрд 530,8 млн сом каржыланды;
Агроөнөр жай комплексин кредиттөө программасы боюнча кайтарым каражаттардын эсебинен 375 насыяга 1 млрд 498,3 млн сом бөлүндү;
“Кыргызстанда асыл тукум мал чарбасын өнүктүрүү”программасынын алкагында 3%дык жеңилдетилген үстөк чен менен 47 насыя берилип, 176,1 млн сом каржыланды;
Чакан жана орто ишкердик субъекттерин жеңилдетилген насыяпрограммасы аркылуу 180 долбоорго 2 млрд 528,2 млн сом берилди;
Бириккен товар өндүрүүчүлөрдү каржылоо программасы боюнча 8 насыяга 46,8 млн сом багытталды;
Үрөнчүлүктү жана питомник чарбасын өнүктүрүү программасынын алкагында 1 долбоорго 1,5 млн сом жеңилдетилген насыя берилди.
Мындан тышкары, Эт кластерин өнүктүрүү боюнча пилоттук долбоордун алкагында 750 млн сомдук каржылоо каралып, долбоорду ишке ашыруу боюнча тиешелүү иштер жүргүзүлүүдө.
Министрлик менен “АБанк” ААК тарабынан ишке ашырылып жаткан мамлекеттик программалар айыл чарба өндүрүшүн кеңейтүүгө, кайра иштетүү өнөр жайын өнүктүрүүгө, чакан жана орто ишкердикти колдоого, асыл тукум мал чарбасын, үрөнчүлүктү жана питомник чарбасын өнүктүрүүгө, ошондой эле жаңы жумуш орундарын түзүүгө жана өлкөнүн азык-түлүк коопсуздугун камсыздоого багытталган.
