Түптө 5 жылда 55 ишкана ачылып, 900 жумуш орду түзүлдү

Мамлекет башчысы Садыр Жапаров Ысык-Көл облусуна болгон иш сапарынын алкагында Түп районунун 2021–2026-жылдардагы социалдык-экономикалык өнүгүүсү менен таанышты. Бул тууралуу президенттин администрациясы кабарлады.

Маалымдалгандай, акыркы беш жылда райондо 55 жаңы ишкана ачылып, 900 жумуш орду түзүлгөн. Өнөр жай өндүрүшүнүн көлөмү 2 эседен ашык өскөн.

Ошондой эле мектептерди, бала бакчаларды, медициналык мекемелерди жана спорттук объектилерди камтыган 128 социалдык объект курулуп, пайдаланууга берилген. Жол инфраструктурасын өнүктүрүү багытында 193,5 чакырым жол асфальтталган.

Учурда райондо "Күрмөнтү" цемент заводун, Түп ГЭСин жана агрологистикалык борборду куруу сыяктуу ири инвестициялык долбоорлорду ишке ашыруу улантылууда.