Кыргызстанда иш берүүчүлөр практикага басым жасаган кадрларды талап кылууда

Кыргызстандагы иш берүүчүлөр кадрларды даярдоо ыкмасын кайра карап чыгуу зарылдыгын белгилешүүдө. Алар теориядан көрө ишке дароо кирише алган адистерге муктаж экенин билдиришкен. Бул тууралуу Эмгек, социалдык камсыздоо жана миграция министрлигинен билдиришти.

Мындай жыйынтык аталган министрликтин Дүйнөлүк банктын колдоосу менен жүргүзгөн жаштардын эмгек рыногу боюнча изилдөөнүн жыйынтыгында белгилүү болду.

Изилдөөгө ылайык, иш берүүчүлөрдүн басымдуу бөлүгү практикалык даярдыкты күчөтүүнү негизги талап катары белгилешкен. Айрым аймактарда бул көрсөткүч 70–80%га жетет.

Ошондой эле окуу программаларын жаңылоо зарылдыгы айтылды. Көпчүлүк иш берүүчүлөр билим берүү мазмуну заманбап технологиялардын талаптарына жооп бербей жатканын белгилешет. Айрыкча санариптик инструменттер жана жабдуулар менен иштөө боюнча көндүмдөр жетишсиз экени айтылган.

Мындан тышкары, бизнес өкүлдөрү билим берүү тармагы менен кызматташууга даяр экенин билдиришип, кадрларды даярдоо процессине катышууну колдошууда.

Бул шартта министрлик Дүйнөлүк банктын колдоосу менен "Жаштар стажировкасы" программасын ишке ашырууда. Программа 16 жаштан 35 жашка чейинки жаштарга алгачкы иш тажрыйбасын алууга мүмкүнчүлүк берет.

Программа өлкөнүн 30 пилоттук шаар жана райондорунда иштеп жатат.

Стажёрлорду тартууну каалаган иш берүүчүлөр төмөнкү шилтеме аркылуу арыз бере алышат: https://docs.google.com/.../1FAIpQLSd8meHVll2.../viewform...

Стажировкадан өтүп, алгачкы иш тажрыйбасын алууну каалаган жаштар бул жерден каттала алышат: https://docs.google.com/.../1FAIpQLSd1TDD4sw3.../viewform...