Ак-Бата конушунда 650 орундуу жаңы мектеп курула башталды
Президенти Садыр Жапаровдун тапшырмасы менен Курулуш министрлиги тарабынан Ак-Бата конушунда 650 орундуу мектептин курулушу башталды.
Министрликтин маалыматына ылайык, учурда курулуш аянтында жер казуу иштери аяктап, негизги этаптарга өтүү алдында турат. Долбоор мамлекеттик казынанын эсебинен каржыланып, мектеп заманбап талаптарга ылайык салынары белгиленди.
Башкы планга ылайык, жаңы билим берүү мекемеси жалпы аянты 5257 чарчы метрди түзгөн, 5 блоктон турган, эки кабаттуу имарат болот.
Жаңы мектеп пайдаланууга берилгенден кийин 1200дөн ашык окуучуну кабыл алууга мүмкүнчүлүк түзүлөт. Бул өз кезегинде аймактагы билим берүү тармагындагы негизги көйгөйлөрдүн бири болгон орун жетишсиздигин жоюуга шарт түзөт.
Учурда иштеп жаткан мектепте орун тартыштыгы байкалып, бир класста 40–50гө чейин окуучу билим алууга мажбур болуп жатканы маалымдалды.
