Бишкекте "экинчи Ботаникалык бак" түзүлөт
Бишкек шаарынын мэри Айбек Джунушалиев "Бишкекжашылкурулуш" муниципалдык ишканасынын питомнигине барып, отургузууга даярдалган көчөттөр менен таанышты. Бул тууралуу муниципалитеттен билдиришти.
Учурда питомниктин аймагына болжол менен 50 миң даана көчөт алынып келинген. Анын ичинен бүгүнкү күнгө чейин 30 миң даана дарак көчөтү отургузулду.
Шаар башчысы иштердин ылдамдыгын күчөтүүнү тапшырды. Айрыкча инфраструктураны жакшыртуу, кызматкерлер жана келген жарандар үчүн ыңгайлуу шарттарды түзүү, эс алуу зоналарын уюштуруу жана бул аймакты "экинчи Ботаникалык бакка" айландыруу милдети коюлду.
Мындан тышкары, көчмө жыйындын алкагында шаар боюнча иштерди жүргүзүү үчүн ишканага 12 даана жаңы атайын техника берилди. Алардын катарына автокран, кичи-экскаватор, фронталдык жүктөгүч, экскаватор, манипулятор жана газондорду тейлөөчү техникалар кирет.
