Айыл чарба тармагында коррупцияга каршы күрөш күчөтүлөт
Суу ресурстары, айыл чарба жана кайра иштетүү өнөр жайы министрлигинде коррупцияга каршы мамлекеттик саясатты ишке ашыруу боюнча жыйын өткөрүлдү. Бул тууралуу ведомстводон билдиришти.
Жыйын министрдин орун басары М.И. Дуйшеевдин төрагалыгы алдында өтүп, ага борбордук аппараттын түзүмдүк бөлүмдөрүнүн жетекчилери катышты. Ошондой эле коррупцияны алдын алуу маселелери боюнча ыйгарым укуктуу өкүл А.А. Алимбеков да катышты.
Иш-чара 2025–2030-жылдарга карата коррупцияга каршы мамлекеттик стратегияны, ошондой эле 2026–2027-жылдарга маалыматтык саясат программасын ишке ашыруу максатында уюштурулду. Мындан тышкары, “Коррупцияга каршы аракеттенүү жөнүндө” мыйзамдын талаптарын аткарууга көңүл бурулду.
Жыйындын жүрүшүндө кызматкерлерге коррупциянын алдын алуу, себептерин жоюу жана укук бузуулардын кесепеттери менен күрөшүү боюнча маалымат берилди. Ошондой эле коррупцияга каршы чараларды күчөтүү жана бул багытта бирдиктүү аракет көрүү боюнча сунуштар талкууланды.
