Флорида штаты Д.Трамптын 10 млрд долларлык доосун четке какты
Флорида штатынын округдук соту АКШнын президенти Дональд Трамп тарабынан "The Wall Street Journal" (WSJ), медиамагнат Руперт Мердок жана басылманын чыгаруучуларына каршы коюлган 10 миллиард долларлык доону четке какты.
Бул доо WSJ жарыялаган макалага байланыштуу берилген. Анда Дональд Трамп финансист Джеффри Эпштейнди туулган күнү менен куттуктап, коомго жат мүнөздөгү сүрөт менен коштолгон кат жөнөткөнү айтылган.
Соттун чечимине ылайык, Дональд Трамп макаланын "чыныгы жаман ниет менен" жарыяланганын далилдей алган жок — бул АКШ мыйзамында жалаа жабуу фактысын аныктоо үчүн керектүү юридикалык стандарт болуп саналат. Ошол эле учурда доогерге "өзгөртүлгөн доо арызын" кайра тапшыруу мүмкүнчүлүгү берилген.
2025-жылдын июль айында WSJ гезити Джеффри Эпштейнге арналган деп айтылган катты жарыялаган. Басылманын маалыматы боюнча, кат Дональд Трамптын колу коюлган жана анда аялдын сүрөтү тартылган. Катта: "Туулган күнүң менен — ар бир күн дагы бир сонун сыр болсун" деген жазуу болгон. Кийинчерээк бул кат финансисттин мураскерлери тарабынан Конгресстин мүчөлөрүнө берилген.
Дональд Трамп бул катты жазганын бир нече жолу четке каккан. 2025-жылдын жай айларында ал жалаа үчүн сотко кайрылып, "кат да, сүрөт да чыныгы эмес" деп билдирген. Ал эми макаланы "жалган, жаман ниеттүү, каралоочу, фейк жаңылык" деп атаган.
