ӨКМ: нөшөрдөн улам сел жана көчкү коркунучу бар
15-апрелден 17-апрелге чейин нөшөрлүү жаан-чачынга байланыштуу өлкөнүн тоолуу жана тоо этектериндеги райондорунда сел жүрүшү мүмкүн. Бул тууралуу Өзгөчө кырдаалдар министрлиги билдирди.
Маалыматка ылайык, айрым аймактарда дарыялардын нугунан чыгып кетүү коркунучу да бар.
Ошондой эле тоолуу райондордо кар көчкү түшүшү ыктымал. Айрыкча Бишкек — Ош унаа жолунун 121–138-чакырымдарында (Төө-Ашуу), 198–250-чакырымдарында (Чычкан капчыгайы, Ала-Бел ашуусу), ошондой эле Балыкчы — Казарман — Жалал-Абад жолунун 326–349-чакырымдарында (Көк-Арт ашуусу) көчкү коркунучу жогору.
Мындан тышкары, күрткү жаралып, жолдордо муз тоңуп, тайгалак болушу күтүлүүдө.
ӨКМ айдоочуларды коопсуздук чараларын сактоого чакырып, жолдо бара жаткан автоунааларга 500 метр аралыкты кармоону сунуштайт.
