Ысык-Көлдө нарколаборатория уюштурган кылмыштуу топ кармалды
Ысык-Көл облусунда баңгизат даярдап, сатуу менен алектенген кылмыштуу топтун иши токтотулду. Бул тууралуу УКМКдан билдиришти.
Маалыматка ылайык, атайын операция облустук милиция кызматкерлери менен биргеликте жүргүзүлгөн.
Тергөөнүн жүрүшүндө баңгизат каражаттарын жана психотроптук заттарды мыйзамсыз жүгүртүүгө тиешеси бар топ аныкталып, анын уюштуруучулары кармалган.
Тинтүү учурунда нарколаборатория табылып, анда баңгизат даярдалганы белгилүү болду. Ошондой эле республика аймагында сатууга багытталган 10 килограмм тыюу салынган зат алынган.
Учурда УКМК аталган кылмыштуу топко тиешеси бар башка адамдарды аныктоо боюнча тергөө иштерин улантууда.
