Жыргалаң курортунда 3 миң карагай көчөтү отургузулду

Ак-Суу районунда жайгашкан "Жыргалаң" лыжа курортунун аймагында ишембилик уюштурулуп, ийне жалбырактуу дарактардын көчөттөрү отургузулду. Бул тууралуу "Ала-Тоо Резорт" ачык акционердик коому маалымдады.

Иш-чаранын алкагында курорттун 3,5 гектар аянты жашылдандырылып, жалпысынан 3000 даана ийне жалбырактуу көчөт тигилди. Демилге аймактагы экологиялык абалды жакшыртууга жана жаратылышты коргоого багытталган.

Иш-чаранын негизги максаттарынын бири — экосистеманы калыбына келтирүү менен бирге жаратылыш ресурстарын сактоо болуп саналат.

Аталган иш-чара "Жашыл мурас" улуттук кампаниясынын алкагында өтүп, өлкө аймагында жашыл зоналарды кеңейтүү, токойлордун аянтын көбөйтүү жана климаттын өзгөрүшүнүн терс таасирин азайтуу боюнча жүргүзүлүп жаткан иш-чаралардын бир бөлүгү болуп эсептелет.