Орунтаев “Манас-Ордодогу” курулуш иштерин тездетүүнү талап кылды
Курулуш, архитектура жана турак жай-коммуналдык чарба министри Нурдан Орунтаев 26-апрелде иш сапары менен Талас облусуна барып, аймакта ишке ашырылып жаткан ири курулуш долбоорлорунун жүрүшүн текшерди. Бул тууралуу ведомстводон билдиришти.
Сапардын алкагында Талас шаарында жүргүзүлүп жаткан беш ири объекттин курулуш иштери каралды. Текшерүүнүн жүрүшүндө министр “Манас-Ордо” комплексиндеги реконструкция иштери белгиленген графиктен артта калып жатканын белгилеп, тиешелүү департаменттердин жетекчилерине жана курулуш компаниясына расмий эскертүү берди.
Министр курулуш иштерин тездетүү жана мөөнөттөрдү так сактоо зарылдыгын баса белгилеп, 10 күндүн ичинде ишти жандандырып, конкреттүү жыйынтык көрсөтүүнү тапшырды.
Долбоорго ылайык, “Манас-Ордо” комплексинде административдик борбор, 300 орундуу конгресс-холл, улуттук стилде салынган коттедждер, жайкы жана кышкы ашканалар, ошондой эле салтанаттуу иш-чараларды өткөрүүчү борборлор курулууда. Мындан тышкары, коноктор үчүн соода жана эс алуу аймагын камтыган галерея жана 3500 орундуу маданий-көпчүлүк иш-чаралар борбору каралган.
Комплекстин жалпы аянты 225 гектарды түзөт. Жаңы долбоордун алкагында музей имаратынын аянты 450 чарчы метрден 1500 чарчы метрге чейин кеңейтилет. Анда кыргыз элинин улуттук өзгөчөлүктөрү заманбап ыкмада чагылдырылат.
Белгилей кетсек, “Манас-Ордо” комплекси акыркы 30 жыл ичинде биринчи жолу ири масштабдагы реконструкциядан өтүүдө. Долбоор министрликке караштуу Шаар куруу жана архитектура департаменти тарабынан иштелип чыккан.
