Сокулукта заманбап агрардык лаборатория ачылды
Сокулук районунун Фрунзе айылында Кыргыз мал чарба жана жайыт илимий-изилдөө институтуна караштуу жаңыланган лабораториянын ачылыш аземи болуп өттү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, лаборатория жайгашкан имарат толугу менен капиталдык оңдоодон өткөрүлүп, заманбап илимий борборго айланды. Долбоорду ишке ашырууга Түштүк Кореянын KOPIA борбору каржылык колдоо көрсөттү. Ошондой эле лаборатория Дүйнөлүк банк каржылаган “Агрардык бизнестин атаандаштык борбору” долбоорунун алкагында жаңы технологиялык жабдуулар менен камсыздалды.
Жаңыланган лабораторияда жайыттарды натыйжалуу башкаруу, тоют даярдоо жана алардын сапатын жакшыртуу боюнча илимий изилдөөлөр жүргүзүлөт. Бул иштер мал чарбасын өнүктүрүүгө жана калктын жашоо деңгээлин жогорулатууга багытталган.
KOPIA борбору буга чейин да Кыргызстанда мал чарбасын өнүктүрүү боюнча бир катар долбоорлорду ишке ашырып келет. Алардын катарына бодо малды жасалма уруктандыруу, сапаттуу үрөн жана тоют даярдоо, ошондой эле заманбап тоют системаларын киргизүү кирет.
Адистердин айтымында, жаңы лабораториянын ачылышы өлкөдөгү агрардык илимди өнүктүрүүдө жана айыл чарба тармагын модернизациялоодо маанилүү кадам болуп саналат.
