МИК: “Социалдык ипотека” боюнча үйлөр баштапкы төлөмсүз берилет
“Социалдык ипотека”, “Жеңилдетилген ипотека” жана “Арзан ипотека” багыттары боюнча турак жайлар жарандарга баштапкы төлөмсүз берилет. Бул тууралуу Мамлекеттик ипотекалык компаниядан билдиришти.
Маалыматка ылайык, аталган программалар боюнча кезеги келген жарандар мурдагыдай эле 25 жылга чейин 4% жана 8% үстөк пайыз менен ипотекалык турак жай ала алышат.
Ошондой эле “Менин үйүм” мамлекеттик турак жай программасынын алкагында өнөктөш банктар аркылуу ипотекалык насыя алган жарандар үчүн турак жай аянтына болгон чектөөлөр кайра каралды.
Жаңы тартипке ылайык, ипотека алган катышуучулар турак жай аянтын өз каражаттарынын эсебинен кеңейтүүгө жана күрөө предметин алмаштырууга мүмкүнчүлүк алышат. Бул учурда МИК тарабынан кошумча каржылоо каралбайт.
Компания белгилегендей, баштапкы төлөм боюнча талаптар өнөктөш банктар аркылуу берилген ипотекалык каржылоого гана тиешелүү болот. Ал эми МИК аркылуу жогорудагы багыттар боюнча турак жайлар баштапкы төлөмсүз берилет.
Эске салсак, буга чейин президент Садыр Жапаров “Менин үйүм” мамлекеттик турак жай программасына өзгөртүүлөрдү киргизүү тууралуу жарлыкка кол койгон. Документ турак жай каржылоо системасын өнүктүрүүгө жана жарандардын жеңилдетилген шартта үй алуусуна шарт түзүүгө багытталган.
