Ататүрк сейил багындагы аттракциондордун ордуна эмне салынат?

Бишкек шаарынын мэринин орун басары Азамат Кадыров жалпыга маалымдоо каражаттарынын өкүлдөрү менен бирге Ататүрк паркынын аймагын кыдырып чыгып, жүргүзүлүп жаткан иштер менен тааныштырды. Бул тууралуу Бишкек мэриясынан билдиришти.

Мэриянын маалыматына ылайык, паркты көрктөндүрүү жана коомдук мейкиндикти өнүктүрүү боюнча масштабдуу иштер жүргүзүлүүдө. Азамат Кадыров белгилегендей, Ататүрк паркынын жаңы концепциясы аттракциондорсуз, жарандардын тынч эс алуусуна жана спорт менен машыгуусуна ылайыкташкан заманбап сейилдөө аймагын түзүүнү көздөйт.

Долбоордун алкагында йога менен машыгуу үчүн атайын аянтча, шахмат ойноо зонасы, узундугу болжол менен 3 чакырымды түзгөн веложолдор жана воркаут аянтчалары курулат.

Ошондой эле паркка кошумча 5 гектар жер кайтарылып берилип, ал аймакта дагы көрктөндүрүү иштери жүргүзүлөт. Бул тилкеде ооган согушунун ардагерлерине арналган музей жана сейилдөө аймагы курулары пландалууда.

Мэриянын маалыматына караганда, парктагы жашыл аймактарды сактоого өзгөчө көңүл бурулууда. Жүргүзүлгөн талдоонун негизинде жалпы 14 миң көчөттүн ичинен 192 куураган дарак аныкталган. Муниципалитет дарактарды мүмкүн болушунча сактап калуу жана аймакты жашылдандыруу боюнча тиешелүү иштерди алып барууда.

Мындан тышкары, "Бермет" кафеси бекитилген дизайн-кодго ылайык ээлери тарабынан реконструкцияланат.

Коопсуздукту камсыз кылуу максатында парктын айланасына, жарык берүүчү мамыларга жана кесилиштерге видеокөзөмөл камераларын орнотуу да пландалууда.