Туристтик сезон тартип сакчылардын көзөмөлүндө
Туристтик сезонду утурлай Бишкек шаарынын ИИББнын туристтик ротасынын кызматкерлери борбор калаанын конокторунун коомдук тартибин жана коопсуздугун камсыздоо боюнча чараларды күчөтүүдө. Бул тууралуу шаардык ИИББнын басма сөз кызматынан кабарлашты.
Билдирүүгө караганда, жүргүзүлүп жаткан иш-чаралардын алкагында милиция кызматкерлери туристтер көп топтолгон жайларды, анын ичинде борбордук көчөлөрдү, аянттарды, сейил бак аймактарын, ошондой эле маданий жана тарыхый объектилерди туруктуу негизде кайгуулдап жатышат.
Өзгөчө көңүл чет өлкөдөн келген жарандар арасында түшүндүрүү иштерине бурулууда. Милиция кызматкерлери борбор калаанын конокторуна коомдук жайларда коопсуз жүрүм-турум эрежелери, сактык чаралары тууралуу маалымат берип, укук бузуулардын алдын алуу жолдорун түшүндүрүүдө.
Мындан тышкары, чет өлкөлүк жарандарга мыйзамсыз аракеттердин курмандыгы болуп калган учурда кандай аракет көрүү керектиги тааныштырылууда.
Жүргүзүлүп жаткан иштер чет өлкөлүк коноктор үчүн ыңгайлуу жана коопсуз шарттарды түзүүгө, борбор калаанын оң имиджин калыптандырууга жана ички иштер органдарына болгон ишеним деңгээлин жогорулатууга багытталган.
