Чет өлкөгө окууга жөнөтөм деп 87 миң сом алган компания акчаны кайтарды
Экономика жана коммерция министрлигине караштуу Монополияга каршы жөнгө салуу кызматы тарабынан жарандан чет өлкөдө билим алуу боюнча кызмат көрсөтүүгө байланыштуу түшкөн кайрылуу каралды.
Текшерүүнүн жүрүшүндө керектөөчү менен уюмдун ортосунда чет өлкөдөгү окуу жайына кабыл алууга көмөктөшүү боюнча келишим түзүлүп, жаран тарабынан 87 миң сом төлөнгөнү аныкталган.
Арыз ээси кызматтар толук көрсөтүлбөгөнүн билдирип, төлөнгөн каражатты кайтарып берүү талабын койгон.
Кайрылууну кароонун алкагында тараптардын катышуусунда жыйындар өткөрүлүп, керектөөчүлөрдүн укуктарын коргоо жана жарандык мыйзамдардын талаптары түшүндүрүлгөн.
Жыйынтыгында Монополияга каршы жөнгө салуу кызматы тарабынан аткаруучуга керектөөчүнүн укуктарын бузуу фактыларын жоюу боюнча көрсөтмө берилди. Натыйжада жаранга 87 миң сом толук кайтарылып берилди.
Кызмат жарандарды билим берүү, консультациялык жана ортомчулук кызматтары боюнча келишим түзүүдө анын шарттарын дыкат кароого чакырат. Айрыкча кызмат көрсөтүүнүн мөөнөтү, тараптардын жоопкерчилиги жана акча каражаттарын кайтаруу тартиби так көрсөтүлүшү керектиги белгиленет.
Ошондой эле "Керектөөчүлөрдүн укуктарын коргоо жөнүндө" мыйзамга ылайык, керектөөчү аткаруучунун иш жүзүндө кеткен чыгымдарын төлөө менен келишимден каалаган убакта баш тартууга укуктуу экени эске салынды.
