Равшанбек Сабиров Кара-Балтадагы мунайды кайра иштетүүчү заводго барды
Инвестициялар боюнча улуттук агенттиктин башчысы Равшанбек Сабиров Кара-Балта шаарындагы чыгыш өнөр жай аймагында жайгашкан "Чайна Петроль Компани "Джунда" ЖЧКсынын мунайды кайра иштетүүчү заводун капиталдык оңдоо жана модернизациялоо боюнча ири инвестициялык долбоордун ишке ашырылышынын жүрүшү менен жеринен таанышты.
Бүгүнкү күндө заводдун долбоордук өндүрүштүк кубаттуулугу жылына 800 миң тоннаны түзөт.
Маалыматка ылайык, ишкананы модернизациялоого багытталган инвестициялардын жалпы көлөмү 193,75 млн АКШ долларына чейин көбөйтүлдү.
Долбоорду ишке ашыруу К4 жана К5 экологиялык класстарындагы күйүүчү майларды өндүрүүгө өтүүгө, өлкөнүн энергетикалык коопсуздугун чыңдоого жана ички рынокту ата мекендик мунай заттары менен камсыз кылууга багытталган.
Улуттук агенттиктин башчысы ишке киргизүү алдындагы жөндөө иштерин толук бүтүрүүнүн жана объектти пайдаланууга берүү боюнча иштерди мурда кабыл алынган милдеттенмелерге ылайык белгиленген мөөнөттө аяктоонун зарылдыгын баса белгиледи.
