Кыргызстан менен WOAH кызматташтыкты чыңдоону талкуулады
Бүткүл дүйнөлүк жаныбарлардын саламаттыгын сактоо уюмунун (WOAH) Делегаттарынын Ассамблеясынын 93-Башкы сессиясынын алкагында Кыргызстандын Ветеринария, мал чарбасын өнүктүрүү, жайыт жана тоют кызматынын директору Адилет Сотовалдиев WOAH уюмунун башкы директору Эммануэль Субейран менен жолугушту.
Айыл чарба министрлигинин маалыматына ылайык, жолугушууда тараптар ветеринария тармагындагы кызматташтыкты бекемдөө, эпизоотиялык туруктуулукту камсыз кылуу жана ветеринардык көзөмөл системасын өнүктүрүү маселелерин талкуулашты.
Ошондой эле WOAH уюмунун эл аралык стандарттарын ишке ашыруу, ветеринардык инфраструктураны жакшыртуу жана техникалык-эксперттик колдоону кеңейтүү маселелерине өзгөчө көңүл бурулду.
Адилет Сотовалдиев WOAH менен кызматташтык өлкөнүн ветеринардык кызматын өнүктүрүүдө маанилүү экенин белгилеп, уюмга көрсөтүлүп жаткан колдоо үчүн ыраазычылык билдирди.
Өз кезегинде Эммануэль Субейран Кыргызстанда жаныбарлардын саламаттыгын коргоо системасын чыңдоого көмөк көрсөтүү улантыларын айтты.
Жыйынтыгында тараптар кызматташтыкты мындан ары өнүктүрүүгө жана биргелешкен демилгелерди ишке ашырууга кызыкдар экенин билдиришти.
