Ысык-Көлдө акылдуу эсептегичтерди орнотуу 98 % аяктады
Ысык-Көл облусунда электр энергиясын автоматташтырылган эсепке алуу системасын киргизүү иштери дээрлик толугу менен аяктады. Бүгүнкү күнгө карата аймактагы турмуш-тиричилик абоненттеринин 98 %ы акылдуу эсептегичтер менен камсыз болду.
Ысык-Көл электр тармактар ишканасынын маалыматына ылайык, облустагы жалпы 124 миң 429 абоненттин 121 миң 460ына заманбап эсептегичтер орнотулду.
Учурда орнотуу иштери убактылуу жашоочулары жок үйлөрдө, ошондой эле Жети-Өгүз жана Тоң райондорундагы алыскы мал чарба кашарларында уланууда.
Акылдуу эсептегичтердин орнотулушу электр энергиясы үчүн төлөм жүргүзүүнү жеңилдетип, абоненттерге бир катар ыңгайлуулуктарды түзөт. Тактап айтканда, эсептегичтерден алынган маалыматтар онлайн режиминде автоматтык түрдө берилип, тургундар "Мой свет" мобилдик тиркемеси аркылуу электр энергиясынын керектөөсүн жана эсептелген төлөмдөрдү көзөмөлдөп, үйдөн чыкпай эле төлөм жүргүзө алышат.
Белгилей кетсек, акылдуу эсептегичтерди орнотуу электр тармактарын модернизациялоонун маанилүү бөлүгү болуп саналат. Бул система электр энергиясын эсепке алууну санариптештирүүгө жана абоненттер үчүн ыңгайлуу шарттарды түзүүгө өбөлгө болот.
