Ошто 10 гектар аянтты ээлеген сейил бак курулуп жатат
Ош шаарында Ак-Буура дарыясынын жээгине жаңы заманбап сейил бак курулуп жатат. Бул тууралуу муниципалитеттен билдиришти.
Бүгүн шаар мэри Жанарбек Акаев Н. Исанов көчөсүндө жайгашкан курулуш объектисинин жүрүшү менен таанышты.
Маалыматка ылайык, сейил бактын курулушу бир ай мурда башталган. Ал Исанов көчөсүнөн Бахапова көчөсүндөгү көпүрөгө чейинки 10 гектар аянтты камтыйт.
Долбоордун алкагында тургундар үчүн бардык шарттар түзүлүп, парк заманбап стилде жасалгаланат. Ошондой эле аймакка жайкы театр куруу пландалууда.
Учурда объектте 30дан ашуун техника иштеп, таман-таш төшөө, бак-дарактарды иретке келтирүү жана асфальт төшөөгө даярдык иштери жүрүп жатат.
