Бишкектеги Достук айылында 750 орундуу жаңы мектеп курулуп жатат
Бишкек шаарынын Биринчи Май районуна караштуу Достук айылында 750 окуучуга ылайыкталган жаңы мектептин курулушу жүрүп жатат. Долбоор Курулуш, архитектура жана турак жай-коммуналдык чарба министрлиги тарабынан ишке ашырылып, республикалык бюджеттен каржыланууда.
Ведомствонун маалыматына ылайык, мектептин курулушу 2026-жылдын февраль айында башталган. Долбоорго ылайык, жалпы аянты 6500 чарчы метрди түзгөн үч кабаттуу заманбап билим берүү мекемеси салынат.
Жаңы мектепте окуу класстары, лабораториялар, китепкана, ашкана, азык-түлүк сактоочу кампалар, жыйындар залы жана бардык шарттары каралган спорт залы жайгашат.
Учурда курулуш аянтында негизги иштер активдүү жүрүп, үчүнчү кабаттын колонналары орнотулууда. Куруучулар ишти ыкчам бүтүрүү максатында эки нөөмөт менен эмгектенип жатышат.
Белгилей кетсек, объекттин курулушу Курулуш министри Нурдан Орунтаевдин көзөмөлүндө жүргүзүлүүдө.
Жаңы мектептин пайдаланууга берилиши аймактагы билим берүү инфраструктурасын жакшыртып, окуучу орундардын жетишсиздигин жоюуга жана балдардын заманбап шартта билим алуусуна өбөлгө түзөт.
