Кадамжайда арпа бышып, гектарынан 4,2 тоннадан түшүм алынууда
Баткен облусунун Кадамжай районунда арпа эгинин жыйноо өнөктүгү башталды. Алгачкы маалыматтар боюнча, ар бир гектардан орточо 42 центнерден түшүм алынууда. Бул тууралуу Айыл чарба министрлигинен билдиришти.
Адистердин айтымында, бул көрсөткүч дыйкандардын үзүрлүү эмгегинин, агротехникалык талаптардын өз убагында жана сапаттуу аткарылышынын натыйжасы болуп саналат. Учурда район аймагында түшүм жыйноо иштери уюшкандыкта жүргүзүлүүдө.
Кадамжай районунда быйыл жалпысынан 4395 гектар аянтка кылкандуу дан өсүмдүктөрү себилген. Анын ичинен 450 гектарын арпа, ал эми калган бөлүгүн буудай ээлейт.
Түшүм жыйноо иштерин өз мөөнөтүндө жүргүзүү үчүн райондо 14 комбайн даярдалып, талааларда иш алып барууда.
Айыл чарба адистери түшүмдү коромжусуз жыйнап алуу жана оруп-жыюу иштерин өз убагында аяктоо боюнча тиешелүү чараларды көрүүдө.
