Баткенде “Герой” БСРи пайдаланууга берилди
Баткен облусунун Кадамжай районундагы Ак-Турпак айылында капиталдык оңдоодон өткөрүлгөн “Герой” суткалык жөнгө салуу бассейни (БСР) пайдаланууга берилди. Ачылыш аземине Министрлер Кабинетинин Төрагасынын орун басары Эрлист Акунбеков катышты. Бул тууралуу Айыл чарба министрлигинен билдиришти.
Бассейндин көлөмү 120 миң м³ болуп, ал Молдо Нияз айыл аймагынын Кыргыз-Кыштак айылындагы 1500 гектар жерди сугат суу менен камсыздоону жакшыртат.
Оңдоо иштеринин алкагында бассейнде 1 млн 852 миң 458 м³ көлөмүндө механикалык тазалоо жүргүзүлүп, дамбанын жээктери бекемделди. Долбоор мамлекеттик бюджеттин эсебинен каржыланды.
Ирригация тармагын өнүктүрүүгө акыркы жылдары бөлүнгөн каражат көбөйүүдө. 2021-жылы бул максатка 520 млн сом, 2025-жылы 1,4 млрд сом бөлүнгөн. Ал эми 2026-жылы 10,3 млрд сом каралып, бүгүнкү күнгө чейин 1,6 млрд сом өздөштүрүлдү.
