БУУнун СЕФАКТ форумунда транзиттик коридорлорду санариптештирүү маселеси талкууланды
Экономика жана коммерция министрлигинин өкүлү Айдарбек Самыкбаев Женева шаарындагы Улуттар сарайында өткөн БУУнун СЕФАКТтын 45-форумунун алкагында уюштурулган "Транзиттик коридорлор боюнча санариптик байланыштуулукту жогорулатуу: саясат боюнча сунуштардан практикалык ишке ашырууга чейин" аттуу саясий диалогго катышты.
Диалог БУУнун Европалык экономикалык комиссиясынын № 50 "Транзиттик коридорлор боюнча санариптик байланыштуулукту жогорулатуу" сунуштамасынын долбооруна арналды.
Анда этап-этабы менен ишке ашырылуучу ыкма каралган. Ал ченемдик укуктук базаны өнүктүрүүнү, маалыматтык системалардын өз ара шайкештигин жана маалыматтарды ишенимдүү алмашууну камсыздоону, санариптик жетилүү деңгээлин жогорулатууну, эл аралык стандарттарды колдонууну жана пилоттук долбоорлорду ишке ашырууну камтыйт.
Өз сөзүндө Айдарбек Самыкбаев деңизге түз чыгуучу жолу жок өнүгүп келе жаткан өлкөлөрдүн жана Борбор Азия мамлекеттеринин транзиттик коридорлорду санариптештирүү, чек ара аралык системалардын өз ара шайкештигин камсыздоо жана аймактык байланыштуулукту өнүктүрүү жаатындагы келечеги тууралуу маалымат берди.
Катышуучулардын сын-пикирлери жана сунуштары коомдук талкуунун жүрүшүндө жана БУУнун СЕФАКТтын № 50 сунуштамасын акыркы редакцияда иштеп чыгууда эске алынат.
