Чүйдө жайыттарды тебелегендерге 38,5 миң сом айып салынды
Чүй облусунун Кашка-Суу айылындагы Ак-Таш жайытында жүргүзүлгөн рейддин жүрүшүндө жайыттарды жана жаратылыш аймактарын бузган жарандарга жалпы 38 миң 500 сом өлчөмүндө административдик айып пул салынды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматы Аламүдүн райондук жол кайгуул кызматы менен биргеликте Ак-Таш жайытында рейддик иш-чара өткөрдү.
Текшерүүнүн жүрүшүндө жайыттарды жана жаратылыш аймактарын авто жана мототранспорт каражаттары менен бузуу боюнча мыйзам бузуулар аныкталып, күнөөлүү жарандарга жалпы суммасы 38 миң 500 сомдук административдик айып пул салынды.
Министрликтин маалыматына ылайык, буга чейин аталган аймакта мыйзам талаптарын сактоо боюнча түшүндүрүү жана эскертүү иштери үзгүлтүксүз жүргүзүлүп келген. Бирок талаптарды атайылап бузуу фактылары катталып жаткандыктан, көзөмөл күчөтүлүп, мыйзам чегинде чаралар көрүлүүдө.
Адистер Ак-Таш жайыты жалпы элдин байлыгы экенин белгилеп, жаратылыш аймактарына автоунаа жана мототранспорт менен мыйзамсыз кирүү экологияга жана жайыттардын абалына олуттуу зыян келтирерин эскертишти.
