Бишкектеги “Ala-Too Trade & Industry Expo” көргөзмөсүнө 90дон ашык компания чогулду
Курулуш, архитектура жана турак жай-коммуналдык чарба министрлигине караштуу Шаар куруу жана архитектура департаментинин Бишкек шаар куруу жана архитектура башкы башкармалыгынын жетекчилиги жана кызматкерлери “Ala-Too Trade & Industry Expo” эл аралык соода жана өнөр жай көргөзмөсүнө катышты.
Иш-чарага Кыргызстандан, Россиядан, Өзбекстандан, Беларусьтан, Кытайдан жана Тажикстандан 90дон ашык компания катышып, өздөрүнүн өндүрүштүк мүмкүнчүлүктөрүн жана заманбап технологияларын сунушташты.
Көргөзмөнүн алкагында курулуш, металлургия, машина куруу, энергетика, химия жана фармацевтика тармактарындагы инновациялык долбоорлор жана өндүрүштүк чечимдер тааныштырылды. Ошондой эле ата мекендик өндүрүштү өнүктүрүү, жаңы өнөктөштүк байланыштарды түзүү жана биргелешкен өндүрүш ишканаларын уюштуруу мүмкүнчүлүктөрү талкууланды.
Мындан тышкары, көргөзмө тажрыйба алмашуу, инвестициялык кызматташтыкты кеңейтүү жана өнөр жай тармагындагы жаңы мүмкүнчүлүктөрдү талкуулоо үчүн натыйжалуу аянтча болуп берди.
Уюштуруучулардын маалыматына ылайык, “Ala-Too Trade & Industry Expo” эл аралык көргөзмөсү өнөктөштөрдү издөө, инвестицияларды тартуу жана өлкөлөр менен аймактар аралык өнөр жай кызматташтыгын өнүктүрүүгө багытталган маанилүү платформа болуп саналат.
