Инженердик изилдөөлөр департаментинин материалдык-техникалык базасы чыңдалууда
Курулуш, архитектура жана турак жай-коммуналдык чарба министри Нурдан Орунтаев министрликке караштуу Инженердик изилдөөлөр департаментинин автобазасына барып, капиталдык оңдоо иштеринин жүрүшү жана жаңы алынган атайын техникалар менен таанышты. Бул тууралуу министрликтен билдиришти.
Маалыматка ылайык, 1978-жылы курулган автобаза имараты көп жылдар бою капиталдык оңдоодон өтпөй, анын техникалык жана өндүрүштүк базасы эскирип калган. Учурда объектте кеңири масштабдагы оңдоо жана жаңылоо иштери жүргүзүлүүдө.
Министр департаменттин кызматкерлери менен жолугушуу учурунда инженердик изилдөөлөрдүн сапаты өлкөдөгү курулуш объектилеринин коопсуздугу үчүн өзгөчө мааниге ээ экенин белгиледи. Ал кызматкерлерди жоопкерчиликтүү иштөөгө, мыйзам талаптарын сактоого жана ачык-айкындуулук принциптерин карманууга чакырды.
"Биз мамлекет тарабынан бардык шарттарды түзүп берип жатабыз. Ар бир кызматкер таза, ак ниет жана жоопкерчиликтүү иштеши керек. Инженердик изилдөөлөрдүн сапаты келечектеги курулуштардын бекемдигин жана коопсуздугун аныктайт", — деди Нурдан Орунтаев.
Белгиленгендей, Инженердик изилдөөлөр департаменти Министрлер Кабинетинин 2025-жылдын 15-июлундагы токтомуна ылайык түзүлгөн. Департамент министрликтин курамына киргенден бери анын материалдык-техникалык базасын чыңдоо жана кызматкерлер үчүн заманбап шарттарды түзүү боюнча иштер жүргүзүлүп келет.
Анын алкагында мекеменин башкы кеңсеси соңку 50 жыл ичинде алгачкы жолу толук капиталдык оңдоодон өткөрүлүп, 2025-жылы пайдаланууга берилген. Учурда ушул сыяктуу иштер автобазанын аймагында да активдүү уланууда.
Министрликтин маалыматы боюнча, бардык оңдоо жана калыбына келтирүү иштери ички ресурстардын эсебинен жүргүзүлүүдө.
