"Ак-Тилек" постунда талаптарга жооп бербеген жүк артка кайтарылды
Өсүмдүктөрдү химиялаштыруу, коргоо жана карантин департаментинин Чүй-Бишкек башкармалыгы тарабынан кыргыз-казак мамлекеттик чек арасына жакын жайгашкан "Ак-Тилек" фитосанитардык текшерүү постунда фитосанитардык көзөмөл жүргүзүлдү. Бул тууралуу Айыл чарба министрлигинен билдиришти.
8-июнда Россия Федерациясынан ташылып келе жаткан 35 м³ пиломатериалдарды текшерүү учурунда фитосанитардык сертификатта көрсөтүлгөн маалыматтар товарды коштоочу транспорттук документтердеги маалыматтарга дал келбегени аныкталган.
Евразия экономикалык биримдигинин бажы аймагында карантиндик фитосанитардык контролду (көзөмөлдү) жүргүзүү тартиби жөнүндө Жобонун 3.7-пунктуна ылайык, аталган жүк жөнөтүүчү тарапка кайра кайтарылды.
Фитосанитардык көзөмөл өлкөнүн фитосанитардык коопсуздугун камсыздоо, карантиндик зыяндуу организмдердин жайылышына жол бербөө жана эл аралык талаптардын сакталышын көзөмөлдөө максатында туруктуу негизде жүргүзүлүүдө.
