"Келечек үчүн билим берүү" долбооруна 6,36 млн доллар бөлүнөт
Президент Садыр Жапаров "Келечек үчүн билим берүү" долбоорун кошумча каржылоо боюнча Кыргыз Республикасы менен Эл аралык өнүктүрүү ассоциациясынын ортосунда түзүлгөн макулдашууларды ратификациялоо тууралуу мыйзамга кол койду.
Мыйзам 2026-жылдын 14-майында Жогорку Кеңеш тарабынан кабыл алынган.
Макулдашуунун алкагында Кыргызстанга мектепке чейинки билим берүү системасын өнүктүрүүгө багытталган 6,36 млн АКШ доллары өлчөмүндө кошумча каржылоо бөлүнөт. Анын ичинен 4,36 млн доллары жеңилдетилген кредит, ал эми 2 млн доллары грант түрүндө берилет.
Долбоор мектеп жашына чейинки балдарды билим берүү менен камтууну кеңейтүүгө, ошондой эле мектепке чейинки билим берүү тармагында мамлекеттик-жеке өнөктөштүк механизмдерин өнүктүрүүгө багытталган.
Кошумча каржылоонун негизги максаты – балдарды күн бою сапаттуу кароо жана өнүктүрүү кызматтары менен камсыз кылуу аркылуу үй-бүлөлөр үчүн мектепке чейинки билим берүүнүн жеткиликтүүлүгүн жогорулатуу.
Каржылоо өтө жеңилдетилген шарттарда берилет. Кредиттин мөөнөтү 50 жылды түзүп, анын алгачкы 10 жылы жеңилдетилген мезгил болуп саналат. Пайыздык ставка жана тейлөө акысы нөл пайыз деңгээлинде белгиленген.
Бул долбоор өлкөдөгү мектепке чейинки билим берүү инфраструктурасын өнүктүрүүгө, балдардын билим алуу мүмкүнчүлүктөрүн кеңейтүүгө жана билим берүү кызматтарынын сапатын жакшыртууга өбөлгө түзөт.
