Кыргызстан менен Беларусь айыл чарба тармагындагы кызматташтыкты бекемдөөдө
5-июнда Беларусь Республикасынын Премьер-министри Александр Турчиндин Кыргыз Республикасына болгон расмий иш сапарынын алкагында Суу ресурстары, айыл чарба жана кайра иштетүү өнөр жайы министрлиги менен Беларусь Республикасынын Айыл чарба жана азык-түлүк министрлиги бир катар эки тараптуу документтерге кол коюшту. Бул тууралуу ведомстводон билдиришти.
Тараптар үрөнчүлүк тармагында өз ара түшүнүшүү жөнүндө Меморандумга кол коюшту. Документ селекция, сорт сыноо, үрөн өндүрүү жана өсүмдүктөрдүн генетикалык ресурстарын сактоо багыттарында кызматташууну өнүктүрүүгө багытталган. Ошондой эле эки өлкөнүн адистештирилген мекемелеринин ортосунда тажрыйба жана заманбап технологиялар менен алмашуу каралган.
Мындан тышкары, Кыргыз-Беларусь айыл чарба жана азык-түлүк тармагындагы кызматташуу боюнча биргелешкен көмөкчү комиссиясынын биринчи жыйынынын Протоколуна кол коюлду. Документ айыл чарба жана азык-түлүк продукцияларынын өз ара соодасын кеңейтүү, асыл тукум мал чарбачылыгын өнүктүрүү, ветеринария жана үрөнчүлүк тармактарындагы кызматташтыкты чыңдоо боюнча жетишилген макулдашууларды бекемдейт.
Кол коюлган документтер Кыргызстан менен Беларусь Республикасынын ортосундагы агрардык кызматташтыкты жаңы деңгээлге чыгарууга өбөлгө түзүп, агроөнөр жай комплексин өнүктүрүүгө, инновациялык технологияларды киргизүүгө жана эки өлкөнүн азык-түлүк коопсуздугун камсыздоого кошумча мүмкүнчүлүктөрдү ачат.
