Нурдан Орунтаев "Алтай" шаарчасынын курулушунун жүрүшү менен таанышты
Курулуш, архитектура жана турак жай-коммуналдык чарба министри Нурдан Орунтаев Бишкек шаарында курулуп жаткан "Алтай" шаарчасындагы курулуш иштеринин жүрүшү менен таанышты.
Ведомствонун маалыматына ылайык, иш сапардын жүрүшүндө министрге долбоордун учурдагы абалы, инженердик даярдоо иштери жана курулуштун этаптары боюнча маалымат берилди.
Нурдан Орунтаев курулуш-монтаждоо иштеринин сапатын жана белгиленген графиктин аткарылышын күн сайын көзөмөлдөөнү тапшырды. Ошондой эле жооптуу адистер тарабынан ар бир курулуш участогу боюнча үзгүлтүксүз мониторинг жүргүзүлүп, аткарылган иштер тууралуу өз убагында маалымат берилип турушу керектигин белгиледи.
Мындан тышкары, министр жарандардын коопсуздугун камсыздоо максатында батирлерди сатуу курулушу активдүү жүрүп жаткан блоктордо гана жүргүзүлүшү зарылдыгын билдирди.
Учурда шаарчанын 600гө жакын блогунда дренаждык системаларды куруу иштери аяктап, пайдубалдарды бекемдөө үчүн арматураларды даярдоо жана орнотуу иштери жүргүзүлүүдө.
Белгилей кетсек, "Алтай" шаарчасы 234 гектар аянтты ээлеген ири турак жай долбоору болуп саналат. Долбоордун алкагында 1551 беш кабаттуу турак үй курулуп, жалпысынан 34 миң батир пайдаланууга берилет. Курулуштун жалпы аянты 1 миллион чарчы метрден ашат.
Шаарчанын аймагында мектептер, бала бакчалар, поликлиникалар, ооруканалар, реабилитациялык борборлор, милициянын аймактык бөлүмдөрү жана өрт-куткаруу кызматтарынын борборлору курулат.
