Ошто 543 батирлүү “Асман Резиденс №1” комплекси пайдаланууга берилди
Президент Садыр Жапаров бүгүн Ош шаарындагы Мамлекеттик ипотекалык компания тарабынан курулган “Асман Резиденс №1” турак жай комплексин жана онлайн форматта Кара-Суу районунун Жаңы-Арык айылындагы жаңы турак жай комплексин ачты.
Салтанаттуу иш-чарада мамлекет башчысы жарандарды жаңы турак жайлуу болушу менен куттуктап, өлкөдө калкты жеткиликтүү жана сапаттуу турак жай менен камсыздоо мамлекеттик саясаттын негизги багыттарынын бири экенин белгиледи.
Президенттин айтымында, учурда мамлекеттик ипотекалык программалардын алкагында өлкө боюнча 82 миңден ашуун батирдин курулушу жүрүп жатат. Ош облусунда жалпысынан 2044 батирлүү үч турак жай комплекси курулса, Ош шаарында 5518 батирди камтыган төрт ири турак жай комплексинин курулушу уланууда.
Алардын бири болгон “Асман Резиденс №1” комплекси сегиз блоктон турган 12 кабаттуу заманбап турак жай болуп саналат. Комплексте жалпысынан 543 батир жайгашкан. Мындан тышкары, жер алдындагы унаа токтотуучу жай, балдар аянтчалары, коммерциялык жайлар жана башка зарыл инфраструктура каралган.
Мамлекет башчысы белгилегендей, комплекстин курулушу баштапкы планда каралган мөөнөттөн мурда бүткөрүлдү. Ал куруучуларга, инженерлерге жана Мамлекеттик ипотекалык компаниянын кызматкерлерине эмгеги үчүн ыраазычылык билдирди.
Ошондой эле Садыр Жапаров онлайн режиминде Кара-Суу районунун Жаңы-Арык айылындагы көп кабаттуу турак жайларды пайдаланууга берүү аземине катышты. Долбоордун биринчи этабында 225 батир ээлерине тапшырылса, жыл соңуна чейин дагы 225 батирди пайдаланууга берүү пландалууда.
Президент турак жай курулуштарында сапатка өзгөчө көңүл буруу зарылдыгын белгилеп, бардык кемчиликтер өз убагында жоюлуп турушу керектигин айтты. Ошондой эле жарандарды көп кабаттуу үйлөрдүн инженердик тармактарына жоопкерчиликтүү мамиле кылууга чакырды.
Иш-чаранын соңунда мамлекет башчысы жаңы батир ээлерине ачкычтарды тапшырып, турак жай комплексинин инфраструктурасы менен таанышты.
