Бишкектеги Ак-Ордо конушунда 750 орундуу мектеп курулууда
Бишкектин Ак-Ордо конушунда 750 орундуу жаңы мектептин курулушу уланууда. Учурда үч кабаттуу имараттын негизги конструкциялары бүткөрүлүп, чатырын жабуу иштери жүрүп жатат. Бул тууралуу Курулуш, архитектура жана турак жай-коммуналдык чарба министрлигинен билдиришти.
Президент Садыр Жапаровдун тапшырмасына ылайык, Бишкек шаарында мектеп жетишсиздиги жаралган райондордо жана жаңы конуштарда билим берүү мекемелери курулууда.
Маалыматка ылайык, учурда Октябрь жана Ленин райондорунда алтыдан, Биринчи Май районунда беш, ал эми Свердлов районунда үч жаңы мектептин курулушу жүрүп жатат.
Алардын бири — Ак-Ордо конушунун Теңир-Тоо көчөсүндө жайгашкан 750 орундуу мектеп. Долбоорго ылайык, үч кабаттуу билим берүү мекемесинде окуу кабинеттеринен тышкары лабораториялар, китепкана, ашкана, жыйындар залы, эмгекке үйрөтүү кабинеттери жана спорт залы болот.
Мектептин курулушу 2026-жылдын февраль айында башталган.
